10 onns - mo ina pintga part ei sin quella pagina

Tetanus - "nies" project pli grond


Al marcau da vinars a Glion ei nies club staus presents cun in stan avon entgins onns. Leu havein vendiu in bien café-vinars e leutier schau schigiar ina massada creflis che nossas dunnas havevan pinau sin quei di. Nies cassier Giachen Caduff ha rapportau denter auter il suandont:


"Sco gudogn schuber savein surdar per il project "eliminate" la biala summa da frs. 2'442.40. Jeu manegiel che quei seigi ina buna caussa e che nus sco club havein fatg fetg buna lavur. In special meret per che tut ei gartegiau ha segir nossa commembra Lidia Tschuor che ha organisau excellentamein noss'acziun ed ei stada igl entir di presenta e ha carmalau resp. motivau bein enqual da contribuir enzatgei per quella buna caussa. In grond engraziament meretan denton segir era las dunnas che han fatg creflis. Quels han gustau als visitaders da nies stan tuttaparti. Era Silvia Thoma e Silvio Capeder meretan grond engraziament, han els gie stuiu sligiar en pliras uras per commembers che han buca saviu esser presents per segidar. Specialmein menziunar lessel era che Roland Albin ha sponsurau las installaziuns per noss'ustria."


"viadis alpesters cun impedi" (adina puspei)

Dapi la fundaziun dil club essan stai cun impedi sin plirs viadis alpesters en Val S. Pieder, ella Camonda da Maighels ed en Val Frisal. Ina biala caussa, muort il termin amiez la stad denton buca adina aschi sempel d'anflar uonda gidonters per quella lavur.


"fiera d'advent 2004 a Glion"

Alla fiera d'advent 2004 a Glion essan nus stai presents cun ina tenda. Naven dalla damaun entochen la sera havein nus vendiu suppa, bubrondas, raviuls (ina spezialitad da nossa commembra Julia Deplazes). Il moderat recav da rodund frs. 700.- havein nus astgau surdar alla Casa Depuoz a Trun.


"Tsunami"

Per ils pertuccai dalla catrastofa dil Tsunami havein nus rimnau daners spontan tier ina sentupada da commembras e commembers il schaner 2005. La summa da frs.800.- havein nus lu astgau surdar medemamein il schaner alla Cadeina da Fortuna.


"malauras 2001"

A caschun dallas malauras dil november 2001 havein nus rimnau rodund 40'000.- per segidar direct cun ils pretuccai. Plinavon havein nus organisau differents Clubs da Kiwanis dalla Svizra che han gidau en differentas valadas a schubergiar praus da plontas, caglias, crappa e glera.


"bus sozial"

Nossa commembra Elisabeth Darms ha mess a disposiziun in bus da sia fatschenta Frut Alpina a Laax per vestgir quel cun reclamas. Ils daners che nus savein lu recaltgar cun quellas ca. 20 reclamas mettin nus en per projects socials. Tals che lessan separticipar a quella acziun s'informar fa aschi bien e semetta en contact cun Eugen Monn, 081 943 32 20.