50 onns Procap Sport

Cun participaziun dalla Casa Depuoz e dils Kiwanis Surselva 

La fin d’jamna dils 12 e 13 da zercladur 2010 han rodund 500 participontas e participonts e 300 hosps sco era gidontras e gidonters priu part als dis da sport 2010 da Procap a Tenero/TI e festivau quei giubileum cun bia sport, giugs, plascher e divertiment. In grondius program accumpignont e da rama han formau quella fiasta tier in eveniment nunemblideivel. A Tenero ein era impedi e sportists dalla Casa Depuoz a Trun e commembers dil club da Kiwanis Surselva stai dalla partida. Cun grond anim ed engaschi ein ils da Trun sengaschai per l’emprema gada tier quellas occurenzas sportivas. La dumengia han ins lu schizun aunc saviu guder dad els in’excellenta presentaziun en gruppa silla tribuna. Ils Kiwanis han segidau en rama d’ina activitad sociala dil club.

 

Procap Sport s’engascha en moda exemplarica per carstgauns cun impediments corporals ni spirtals. Cun purschidas da sport vegn la sanadat e l’independenza pigl agir da mintgadi promovidas. Il plascher vid il moviment e la fitness gidan ils sportits en moda zun cunsteivla, mo medemamein era ils tgiraders e las famiglias. Il sport caschuna plascher, ventira e cuntentientscha. Tuttas persunas involvadas san seprofitar da quella fortuna, ils ins sco activs ed ils auters sco accumpignaders.

L’organisaziun da Kiwanis s’engascha sigl entir mund per concarstgauns cun handicaps, oravontut pils affons, per ch’ei mondi in téchet meglier cun els. Tier ils dis da Procap Sport a Tenero han ils Kiwanis Sursilvans astgau segidar gia per la tiarza gada. Ed igl onn 2014 han liug leu puspei gronds dis da sport sut l’egida a Procap, e quei cun participaziun da Kiwanis e speronza era dils habitonts dalla Casa Depuoz.

 

 

__________________________________________________________________________

 

Fiasta da sport per carstgauns cun handicap a Tenero, 21./22.6.2014

Gia per la tiarza gada han ils commembers e las commembras dil club da Kiwanis Surselva cun lur famiglias funczionau sco gidonders als 48-avels dis da sport naziunals da Procap el Centro Sportivo a Tenero. La bellezi’aura dalla fin d’jamna dils 21. e 22 da zercladur ha purschiu idealas relaziuns als rodund 250 sportists impedi ord l’entira Svizzra e 150 gidonters han procurau per ina fiasta sportiva ed in program accumpignont nunemblideivel. Che rodund 20 cussedents ord la Casa Depuoz ein gia per la secunda gada separticipai a quella fiasta da Procap Sport ei fetg legreivel e mereta grond respect, era pil persunal accumpignont. La gronda gruppa da Trun ha lu dau alla fin dils giugs sportivs digl emprem di ina grondiusa e bein preparada producziun or el liber cul thema "campiunadi mundial da ballapei" ed igl applaus dils numerus aspectaturs ei staus frenetics. In grond bravo e compliment per quella super-prestaziun. Era ils da Trun han gudiu dus bials dis a Tenero e beinenqualin ha durmiu empau cuort!

Procap Sport s’engascha en moda exemplarica per gronds e pigns sportists cun impediments. Il sport e moviment promovan tier in e scadin la sanadad ed il beinstar corporal. Ils sport caschuna denton era plascher, ventira e variaziun. Negliu ves’ins tontas fatschas rientas ed engrazieivlas sco ad ina tala fiasta. Nus Kiwaners essan loschs d’astgar esser stai dalla partida. Lein sperar ch’ei detti en quatter onns puspei gronds e bials dis da sport ed in seveser a Tenero.